Teks Laporan Asil Observasi Kelas 9

Teks pelaporan hasil observasi yaiku teks seng nerangake asile observasi kang wes ditindakake. Observasi yoiku pengamatan utawa penelitian obyek kanthi cetho.

Struktur laporan asil observasi

a. Dhefini umum / idhentifikasi yaiku perangan utawa bagean sing nerangake titikan (ciri-ciri), barang, tandha, lan sapanunggalane.

b. Dheskripsi bagaen / klasifikasi yaiku perangan sing mantha -mantha manut jinis utawa klompoke, utawa perangan sing nerangake gegembaran sing luwih rinci.

c. Dheskripsi manfaat / kagunan yaiku perangan sing mujudake simpulan utawa dudutan saka asile observasi

Wacan ing ngisor iki wacanen kang titi!

Pencemaran ing DAS Kali Brantas

            Kahanan ing daerah aliran sungai (DAS) kali Brantas wiwit saka hulu nganti hilir saya nguwatirake. Karusakan ing sadawane kali Brantas kang klebu kali utama ing Jawa Timur kasebut bisa ngancem panguripan 14 yuta warga Jawa Timur. Pratelan iki dicathet dening sawijining Organisasi Pecinta Lingkungan “ Sahabat Sungai Indonesia” sadurunge nindakake panliten ing kali Brantas saka Malang nganti tekan Surabaya ing dina Setu, 13 April 2013. Kegiyatan nyusur kali brantas kang suwene nem dina nganti 18 April 2013 kasebut ditindakake ing sadawane kali. Kegiyatan nyusur kali iki kanggo ngematake kahanane banyu kali lan resepane ing sakiwa tengene kali Brantas. Para Sahabat Sungai Indonesia nindakake panliten iki kanthi ancas kanggo mangerteni kahanane banyu lan karusakan-karusakan lingkungan ing sadawane DAS kali Brantas.

            Saka panliten sing wis ditindakake Sahabat Sungai Indonesia,pranyata akeh ,sumber banyu kang ilang saka Dhaerah Aliran Sungai Brantas.”Kahanan DAS Brantas saya nguwatirake wiwit saka hulu nganti tekan hilir. Ing tlatah hulu yaiku ing kutha Batu kecathet  saya akeh sumber banyu kang ilang merga digawe sumber irigasi lan bahan baku ngombe kemasan. Ing tengah lan ing hilir wis dicemari dening lembah industri,”Mangkono pangendikane koordinator Sahabat Sungai Indonesia, Catur Nusantara ing Malang wektu kapungkur. Miturut mas Catur, ing tlatah tangkepan banyu DAS kali Brantas (gunung Wilis, Arjuna, Kelud, Welirang, lan Semeru kulon) wiwit taun 1998-2007 wis akeh kelangan sumber-sumber banyu.

            Ing kutha Batu sing dadi kawasan hulu saka kali brantas sumber-sumber banyune mung kari sethithik. Cacahe kari nyiysakake 58 sumber banyu saka 111 umber banyu kang ana sadurunge.”Yen sumber banyu kanggo ngombe lan irigasi terus kekikis, mula masyarakat bakal kangelan anggone golek banyu. Suwe-suwe masyarakat malih tuku banyu kanggo bisa oleh banyu, lan iki musibah,” mangkono andharane mas Catur. Saliyane babagan sumber banyu lan resepane, mas Catur ngandharake menawa DAS kali Brantas uga nandhang pencemaran kang mrihatinake banget. Ora mung limbah pomahan (rumah tangga) wae sing gawe pencemaran, ananging uga limba industri kang mapan ing sadawane kali Brantas. Sahabat Sungai Indoneia nyathet menawa ana 1.054 pabrik ing sadawane kali brantas, 40 saka pabrik kasebut nduweni potensi ndadekake kali brantas tercemar amarga nduweni kapasitas limbah 330 ton saben dinane.

            Kahanan ing sakiwa tengene DAS kali Brantas gawe pengaruh uga tumprap kualitas banyu ing kali Brantas. Anton Nevenanto, Dhosen Sosiologi Lingkungan Universitas Brawijaya Malang kang melu nliti kali Brantas ngandharake, menawa perkembangan dharatan ing sakiwa tengene DAS kali Brantas uga nggawa pengaruh tumprap kualitas banyu ing kali Brantas. Menawa daerah ing nduwur kali gundhul bakal dumadi erosi kang ndadekake sedimentasi ing jero kali. Sedimentasi iki nyata bakal nggagu iline banyu ora lancar bakal nyebabake dumadine banjir.

1. Apa irah-irahan wacan sing wis kok waca ing ndhuwur?

2. Andharake makna kata kang ana ing wacan ndhuwur!

3. Andharake makna ungkapan kang kaandhut sajrone wacan!

4. Isi kang kaandhut ing sajrone wacan kuwi mau apa?

5. Andharake isi sajrone wacan kasebut!

6. Jelasake pesan moral kang kaandhut ing sajrone wacan kasebut!